ശശികല ജയിൽമോചിതയായി : കോവിഡ് നെഗറ്റീവ് ആയാൽ ചെന്നൈയിലേക്ക് തിരിക്കും

തമിഴ്നാട് മുൻ മുഖ്യമന്ത്രി ജയലളിതയുടെ തോഴിയും എഐഎഡിഎംകെ മുൻ ജനറൽ സെക്രട്ടറിയുമായ ശശികല ജയിൽമോചിതയായി. എന്നാൽ, ഉടൻ തന്നെ ഇവര്‍ തിരികെ ചെന്നൈയിലേക്ക് മടങ്ങില്ലെന്നാണ് റിപ്പോര്‍ട്ടുകള്‍.

കൊവിഡ് ബാധിച്ച് ബെംഗളുരുവിലെ ആശുപത്രിയിൽ ചികിത്സയിലാണ് ഇപ്പോള്‍ ശശികല. കൊവിഡ് ഫലം നെഗറ്റീവ് ആയാൽ മാത്രമേ ശശികല ചെന്നൈയിലേക്ക് മടങ്ങുവാന്‍ സാധിക്കുകയൊള്ളു.

ഇതിനിടെ, മോചിതയാകുന്നതുമായി ബന്ധപ്പെട്ട രേഖകള്‍ ജയിൽ അധികൃതര്‍ ആശുപത്രിയിലെത്തി കൈമാറുകയും ചെയ്തു. അനധീകൃത സ്വത്ത് സമ്പാദന കേസിലാണ് ശശികലയെ നാല് വര്‍ഷത്തേക്ക് ശിക്ഷിച്ചത്. 2017 ഫെബ്രുവരി 15നാണ് ശശികലയും കൂട്ടുപ്രതികളായ ഇളവരസി, സുധാകര്‍ എന്നിവരേയും കോടതി വിധി നടപ്പിലാക്കി ജയിലിൽ അടച്ചത്.

കൂട്ടുപ്രതികളായ ഇളവരസിക്കും കൊവിഡ് രോഗം ബാധിച്ചിരുന്നു. ഇവരും നിലവിൽ ചികിത്സയിലാണുള്ളത്. ഇവര്‍ ഫെബ്രുവരി മാസത്തോടെ ജയിൽ മോചിതയാകും. എന്നാൽ, മറ്റൊരു പ്രതിയായ വി.എൻ സുധാകര്‍ 10 കോടി രൂപ പിഴ അടയ്ക്കാത്തതിനാൽ കുറച്ചുകാലം കൂടി ജയിലിൽ കഴിയേണ്ടി വരും.

കൊവിഡ് ലക്ഷണങ്ങള്‍ കുറഞ്ഞതിനെ തുടര്‍ന്ന് കഴിഞ്ഞ ദിവസം തീവ്രപരിചരണ വിഭാഗത്തിൽ നിന്നും വാർഡിലേക്ക് മാറ്റിയിരുന്നു.ഇതിനിടെ തിരികെ ചെന്നൈയിൽ എത്തിയാൽ മറീനയിലുള്ള ജയലളിത സ്മാരകം ആയിരിക്കും സന്ദര്‍ശിക്കുക എന്നും റിപ്പോര്‍ട്ടുണ്ട്. മുൻ മുഖ്യമന്ത്രി അണ്ണാദുരൈയുടെ ജന്മദിനത്തിനാകും എത്തുക എന്നും സൂചനകളുണ്ട്.അതിനിടെ, തമിഴ്നാട് മുഖ്യമന്ത്രി എടപ്പാടി പഴനിസ്വാമി ജയലളിതയുടെ ശവകുടീരം തുറന്നു കൊടുത്തു. ഉപമുഖ്യമന്ത്രി ഒ പനീർശെൽവും ചടങ്ങിൽ സന്നിഹിതനായിരുന്നു.

Top