കോവിഡ്​ 19 പ്രതിരോധ വാക്​സിന്‍ കുത്തിവെപ്പുകള്‍ നല്‍കാനാണ്​ കേന്ദ്രസര്‍ക്കാര്‍ ഇന്ധന വില കൂട്ടുന്നതെന്ന് കേന്ദ്ര മന്ത്രി രമേശ്വര്‍ തേലി

രാജ്യത്ത് പെട്രോളിനേക്കാള്‍ വില കുപ്പിവെള്ളത്തിനാണെന്ന് കേന്ദ്രമന്ത്രി രമേശ്വര്‍ തേലി. കുടിവെള്ളത്തിന്‍റെ വിലയുമായി താരതമ്യം ചെയ്യുമ്പോള്‍ രാജ്യത്ത്​ പെട്രോള്‍, ഡീസല്‍ വില കുറവാണെന്നും, ജനങ്ങള്‍ക്ക്​ സൗജന്യ കോവിഡ്​ 19 പ്രതിരോധ വാക്​സിന്‍ കുത്തിവെപ്പുകള്‍ നല്‍കാനാണ്​ കേന്ദ്രസര്‍ക്കാര്‍ ഇന്ധനനികുതി ഈടാക്കുന്നതെന്നും മന്ത്രി മാധ്യമങ്ങളോട് പറഞ്ഞു.

‘പെട്രോളിന്‍റെ വില ഉയര്‍ന്നതല്ല, എന്നാല്‍ നികുതി ചുമത്തുന്നു. ഇത്​ അര്‍ഥമാക്കുന്നത്​ വിഭവങ്ങളുടെ ലഭ്യത വര്‍ധിപ്പിക്കണമെന്നാണ്. മറ്റു സംസ്​ഥാനങ്ങളെ അപേക്ഷിച്ച്‌​ അസമില്‍ വാറ്റ്​ (വാല്യൂ ആഡഡ്​ ടാക്​സ്​) കുറവാണ്. പെട്രോള്‍ വില അധികമല്ല. എന്നാല്‍ അതില്‍ നികുതിയും അടങ്ങിയിരിക്കുന്നു. ഒരു കുപ്പി കുടിവെള്ളത്തിന്‍റെ വില ഇന്ധനവിലയേക്കാള്‍ ഉയര്‍ന്നതാണ്​. പെട്രോളിന്‍റെ വില 40 രൂപ. അസം സര്‍ക്കാര്‍ വാറ്റായി 28 രൂപ ചുമത്തുന്നു. പെട്രോളിയം മന്ത്രാലയം 30 രൂപയും ചുമത്തുന്നു. ഇതോടെ 98 രൂപയായി. എന്നാല്‍ നിങ്ങള്‍ ഹിമാലയന്‍ വെള്ളം കുടിച്ചിട്ടുണ്ടോ? ഒരു കുപ്പിവെള്ളത്തിന്​ 100 രൂപയാണ്​ വില. എണ്ണവിലയല്ല, വെള്ളത്തിന്‍റെ വിലയാണ്​ കൂടുതല്‍’, മന്ത്രി പറഞ്ഞു.

‘കേന്ദ്രസര്‍ക്കാര്‍ പിരിക്കുന്ന നികുതിയില്‍ നിന്നാണ്​ ജനങ്ങള്‍ക്ക്​ സൗജന്യ വാക്​സിന്‍ നല്‍കുന്നതിനുള്ള പണം കണ്ടെത്തുന്നത്. ഇന്ധനവില ഉയര്‍ന്നതല്ല, എന്നാല്‍ അതില്‍ ഈടാക്കുന്ന നികുതിയും ഉള്‍പ്പെടുന്നു. നിങ്ങള്‍ക്ക്​ സൗജന്യ വാക്​സിന്‍ നല്‍കണം. പണം എവിടെനിന്ന്​ ലഭിക്കും. നിങ്ങള്‍ വാക്​സിന്​ പണം നല്‍കിയിട്ടില്ല, എന്നാല്‍ ഇവ എവിടെനിന്നാണ്​ ലഭിച്ചത്​’, മന്ത്രി കൂട്ടിച്ചേർത്തു.

Top